Би – Буряад

Эхынгээ умайhаа унахадаа,
Эрьенсэг түбиин зоболон соо
Хүмүүн бэе эдлэhэн заяатай
Хэзээдэшье би – Буряад.
Худан голойнгоо эрье зубшан, 
Хүхэбтэр hайхан ногоон соо
Хүлөө шоройдон, холые тааhан
Хэзээдэшье би – Буряад.
Нагаса эжынгээ хормойдо няалдан,
Хониёо эрьюулээд, хурьгадаар наадажа,
Нарай бага наhаяа үргэлhэн
Хэзээдэшье би – Буряад.
Түрүүшынхиеэ үзэгүүдтэй танилсаад,
Түрэл хэлэндээ угаа дурлажа,
Хурдан уншалгаар багшаяа баясуулhан
Хэзээдэшье би – Буряад.
Сагай гүйдэлэй түргэн соо
Сансарай гашуудал, баяршье үзэжэ,
Халуун шуhандаа хамагые багтааhан
Хэзээдэшье би – Буряад.
Залуу дээрээ дэлхэйн hайханиие хаража,
Заатагүй ушарха үндэр наhандаа
Хуушахан буусаяа тахиха хүсэлтэй
Хэзээдэшье би – Буряад –
Би – буряад басаган!

12.08.2010

Посмотреть больше — RSS

Анкета пользователя

Комментарии

Комментарий к: Xoriburyad
Бахархамаар! Омогорхомоор! Сайн даа! Ехэ баясабаб!